يتيم الحب

يا طير الي يحط على الاشجار
حزن تغيرد صوتك حيل يشبهني
ويا نهر دجله جيت الك عطشان
ليش شو شفتك ما روتني
ويا بحر يحمل بروجه القهر
ليش انه الوحيد الغركتني
ادريها الدنيه ما تضحك ويايه
وكل ما ضحكتلها بحسره بجتني
سفينه اصبحت بلا شراع
ويا قرصان اجه وصعد متني
صبر ايوب شايل مو صبر بنصاف
من شوكت اني احزاني وكعتني
انصحك لان الجروح هوايه
اجروح عمري العلمتني
اذا بعينك دمع لا تبجي للناس
راح تكول دمعة وندمتني
واذا صبرك خلص انفخ بصدرك
اخزر الدنيه بعيونك وكول ماخسرتني
عمري 13 واضحك على الجروح
يتيم الفرح واحزاني التبنتني
احذرك من توكع محد يمدلك ايد
كوم على حيلك وكول حجاره عثرتني
من تبلع بريكك قهر مجبور
بضحكة كلهم اسف لكمة غصتني
الفلس بيدينك يساوي هوايه
ثق اعرف بشر لجل الفلس باعتني
هاي الدنيه تغيرت بيها الناس
يا كثر المواقف ما حنتني
بس هزني طفل صغير
يتيم بجه ودموعه دمرتني
كال انه لا اب ولا ام
وبديه الدنيه شالتني شمرتني
حليب الرضعته دموع يا خوي
وبجيت كبال عينه دموعي خانتني
رسمت ابتسامه استفزه علخدين
عود اني شامت روحي جبرتني
كام على حيله وضحك صافحني بيديه
كال اضحك وياك شو صدكني
كال منين الي احزان اني
بصراحه بدمعتك ضحكتني

وهو هدومه مشككه و واكف كبالي
وهو حاله الدمار وامر من حالي
وهو صبر الذيابه بضلمة ليالي
ذهلني بأفعاله ولزمني سكوت
كابر واحس حسراته ردعتني

كمت حضنته وصحتله بصوت
صح انت فقير بس اذهلتني
صح انت صغير بس أعجبتني
اعرف ناس باست ايدين لأجل تملك فلوس
وانت بلا جنح وعيونك تحدتني
اني اهنيك من شاعر كتلته الحسرات
انت طفل بكل احترام كدامك وكفتني