لكل عراقي شريف

--------------------------------------------------------------------------------

السلام عليكم ورحمة الله وبركاته

كيف الحال ان شاءالله بخير ياربي

امـــــا بــــعـــــد !!


مل مني القلم ومن القلم مليت
......................... عمت عينه قلمنه المـا نفع شِعره
تعب حته الشِعر ويه العراقيين
......................... وصار بحال اهلنه وبالعراق ادره
رسمت حروف العراق برسم فنان
......................... وجمعت اربيل والانبار والبصره
وگلت لازم حروفي توحد الخوّان
.......................... ما معقـوله هيچ تصير فد مرّه
ورديت ولگيت دموع عالوجنات
......................... حروف الرسمتهه اليوم متطشره
كردستان تحچي بزودهه وتگول
.......................... احنه العاصمه وبغـداد متأخره
والانبار شالت سيف عالخوان
......................... لو لـيّه الحكم لـو فلّش الاسره
والبصره تگول احنه نريد اقليم
......................... ومن نفط العراق الكُم فقط عُشره
وشفت للفتنه والله العراقيين
......................... دون حروف جر يا ناس منجرّه
مذبوحه المحبه وناس تكره ناس
........................ سويّه اللي يحب والقابض الجمره
رقم جبنه قياسي بالقتل والموت
................... وصرنه اول شعب نص اهله متهجره
نهر دجله يـا ناس من الجثث غرگان
......................... خلي نمد ادينه لدجـله وانجرّه
على جثثنه تدوّر هالفضـائيات
.......................... ياهو اللي يصور ياخذ الاجره
معصوبه العيون مچتفه الايدين
....................... وانواع الرصاص يچوب بصدره
لا اهله اجوي وچـفّنوه بچفان
......................... مجهول الهويه ومن دره بأمره
اذا امّه الحنونه الصايمه برمضان
......................... ما اكلت اكلهه وبقت تنتظـره
تنتظره يرد وتريد تحچي وياه
......................... اثاري العيد لازم ينگطع مهره
لأن باعت ذهبهه بشارع الصياغ
....................... حته تزوج ابنهه الما فرح عمره
ما نامت بقت سهرانه كل الليل
......................... أيا ليل العراق الما بزغ فجره

وما جاهه صبر طلعت تدور عليه
......................... مثل طلعة حمامه بعينهه العبره
وما شافت ابنهه وجاهه ملك الموت
.................... تعرف شنهي يعني تموت بالحسره؟
معناها الفرح صاير مثل رجّال
....................... شايل ورده بيده وخنجر بضهره
معناها عراقك كاتل ومكتول
......................... سوده گلوبهم وعقـول مفتره
وكل هذا ويگلي احنه العراقيين
....................... سنه وشيعه عشنه الحلوه والمره!
لا والله چذب احنه العراقيين
....................... سنه وشيعه مثل الضره عالضره
ملينه الچذب وليمته وليادوب
......................... واقع حال لازم نخضع لامره
ملينه الچذب وليمته وليا دوب
......................... قصايدنه اجت للناس متأخره
نعم خوّان احنه وياك آني بهاي
......................... بس مو من بعد تفجير سامرّه
بعد تفجير سامرّه العراقيين
....................... مثل فلم الرعب ودمايته الحمره
مو فتنه صحيح الصايره ابّغداد
......................... سونامي الفتن بغداد منتشـره
قتل مو عالهويه هواي متوهمين
.................. صارت عالاسم گص راسه ويشمره
واليگلّي تبالغ انته حيل بهاي
........................ جبت حجه ودليل وياي هالمرّه
اتحده بكر واتحده ابو الخطاب
......................... فنّه واحد البيهُم يوصل الثوره
واتحده على واتحده هم حسين
...................... اذا فلوجه طبهه ومناتقي اللهر ضهره
صفر كل النتايج للعراقيين
.................... بس بالفتنه جابوا عشره من عشره
هذا يگول سني ناصبي اغتالوه
..................... وهذا يگول شيعي رافضي نكفره
ضلّوا بهالسوالف يا خزي ويا عار
........................ واسرائيل علگت نارهه الكبره

يول وين الـشرف گدامكم بغداد
.......................... شگّوا ثوبهه واخذوهه متأسره
اغتصبوهه الكُفر، ما تسمعوهه تصيح؟
......................... آنه ام الشرف واليوم مو عذره
بعد والله ما يـنفعنه قيل وقال
....................... لأن كلشي انتهه واناتقي اللهرت الجرّه
مرحوم العراق استشهد من سنين
......................... يا وسفه صفت أشلائه مـتنثره
متنـــثره بمزابل يمهة كوم چلاب
......................... اكلت من لحومه وما درت سرّه
صير وياي بس هالمره، أترجاك
......................... عيب من العـراق اليوم نتبرّه
صعبه بمزبله جثة الـعراق تصير
......................... خلي نشـيله منها وندفنه بگبره

ان شاءالله

تنال اعجابكم ورضاكم